وَٱلشَّمْسِ وَضُحَىٰهَا

سورج کی قَسم اور اس کی روشنی کی قَسم،

وَٱلْقَمَرِ إِذَا تَلَىٰهَا

اور چاند کی قَسم جب وہ سورج کی پیروی کرے (یعنی اس کی روشنی سے چمکے)،

وَٱلنَّهَارِ إِذَا جَلَّىٰهَا

اور دن کی قَسم جب وہ سورج کو ظاہر کرے (یعنی اسے روشن دکھائے)،

وَٱلَّيْلِ إِذَا يَغْشَىٰهَا

اور رات کی قَسم جب وہ سورج کو (زمین کی ایک سمت سے) ڈھانپ لے،

وَٱلسَّمَآءِ وَمَا بَنَىٰهَا

اور آسمان کی قَسم اور اس (قوت) کی قَسم جس نے اسے (اذنِ الٰہی سے ایک وسیع کائنات کی شکل میں) تعمیر کیا،

وَٱلْأَرْضِ وَمَا طَحَىٰهَا

اور زمین کی قَسم اور اس (قوت) کی قَسم جو اسے (امرِ الٰہی سے سورج سے کھینچ دور) لے گئی،

وَنَفْسٍۢ وَمَا سَوَّىٰهَا

اور انسانی جان کی قَسم اور اسے ہمہ پہلو توازن و درستگی دینے والے کی قَسم،

فَأَلْهَمَهَا فُجُورَهَا وَتَقْوَىٰهَا

پھر اس نے اسے اس کی بدکاری اور پرہیزگاری (کی تمیز) سمجھا دی،

قَدْ أَفْلَحَ مَن زَكَّىٰهَا

بیشک وہ شخص فلاح پا گیا جس نے اس (نفس) کو (رذائل سے) پاک کر لیا (اور اس میں نیکی کی نشو و نما کی)،

وَقَدْ خَابَ مَن دَسَّىٰهَا

اور بیشک وہ شخص نامراد ہوگیا جس نے اسے (گناہوں میں) ملوث کر لیا (اور نیکی کو دبا دیا)،

كَذَّبَتْ ثَمُودُ بِطَغْوَىٰهَآ

ثمود نے اپنی سرکشی کے باعث (اپنے پیغمبر صالح علیہ السلام کو) جھٹلایا،

إِذِ ٱنۢبَعَثَ أَشْقَىٰهَا

جبکہ ان میں سے ایک بڑا بد بخت اٹھا،

فَقَالَ لَهُمْ رَسُولُ ٱللَّهِ نَاقَةَ ٱللَّهِ وَسُقْيَٰهَا

ان سے اﷲ کے رسول نے فرمایا: اﷲ کی (اس) اونٹنی اور اس کو پانی پلانے (کے دن) کی حفاظت کرنا،

فَكَذَّبُوهُ فَعَقَرُوهَا فَدَمْدَمَ عَلَيْهِمْ رَبُّهُم بِذَنۢبِهِمْ فَسَوَّىٰهَا

تو انہوں نے اس (رسول) کو جھٹلا دیا، پھر اس (اونٹنی) کی کونچیں کاٹ ڈالیں تو ان کے رب نے ان کے گناہ کی وجہ سے ان پر ہلاکت نازل کر دی، پھر (پوری) بستی کو (تباہ کر کے عذاب میں سب کو) برابر کر دیا،

وَلَا يَخَافُ عُقْبَٰهَا

اور اﷲ کو اس (ہلاکت) کے انجام کا کوئی خوف نہیں ہوتا،