سَأَلَ سَآئِلٌۢ بِعَذَابٍۢ وَاقِعٍۢ

ایک سائل نے ایسا عذاب طلب کیا جو واقع ہونے والا ہے،

لِّلْكَٰفِرِينَ لَيْسَ لَهُۥ دَافِعٌۭ

کافروں کے لئے جسے کوئی دفع کرنے والا نہیں،

مِّنَ ٱللَّهِ ذِى ٱلْمَعَارِجِ

(وہ) اللہ کی جانب سے (واقع ہوگا) جو آسمانی زینوں (اور بلند مراتب درجات) کا مالک ہے،

تَعْرُجُ ٱلْمَلَٰٓئِكَةُ وَٱلرُّوحُ إِلَيْهِ فِى يَوْمٍۢ كَانَ مِقْدَارُهُۥ خَمْسِينَ أَلْفَ سَنَةٍۢ

اس (کے عرش) کی طرف فرشتے اور روح الامین عروج کرتے ہیں ایک دن میں، جس کا اندازہ (دنیوی حساب سے) پچاس ہزار برس کا ہے٭، ٭ فِی یَومٍ اگر وَاقِعٍ کا صلہ ہو تو معنی ہوگا کہ جس دن (یومِ قیامت) کو عذاب واقع ہوگا اس کا دورانیہ ٥٠ ہزار برس کے قریب ہے۔ اور اگر یہ تَعرُجُ کا صلہ ہو تو معنی ہوگا کہ ملائکہ اور اَرواحِ مومنین جو عرشِ اِلٰہی کی طرف عروج کرتی ہیں ان کے عروج کی رفتار ٥٠ ہزار برس یومیہ ہے، وہ پھر بھی کتنی مدت میں منزلِ مقصود تک پہنچتے ہیں۔ واﷲ أعلم بالصواب۔ (یہاں سے نوری سال (لا‌ّّّئٹ ائیر) کے تصور کا اِستنباط ہوتا ہے۔)

فَٱصْبِرْ صَبْرًۭا جَمِيلًا

سو (اے حبیب!) آپ (کافروں کی باتوں پر) ہر شکوہ سے پاک صبر فرمائیں،

إِنَّهُمْ يَرَوْنَهُۥ بَعِيدًۭا

بے شک وہ (تو) اس (دن) کو دور سمجھ رہے ہیں،

وَنَرَىٰهُ قَرِيبًۭا

اور ہم اسے قریب ہی دیکھتے ہیں،

يَوْمَ تَكُونُ ٱلسَّمَآءُ كَٱلْمُهْلِ

جس دن آسمان پگھلے ہوئے تانبے کی طرح ہو جائے گا،

وَتَكُونُ ٱلْجِبَالُ كَٱلْعِهْنِ

اور پہاڑ (دُھنکی ہوئی) رنگین اُون کی طرح ہو جائیں گے،

وَلَا يَسْـَٔلُ حَمِيمٌ حَمِيمًۭا

اور کوئی دوست کسی دوست کا پرساں نہ ہوگا،

يُبَصَّرُونَهُمْ ۚ يَوَدُّ ٱلْمُجْرِمُ لَوْ يَفْتَدِى مِنْ عَذَابِ يَوْمِئِذٍۭ بِبَنِيهِ

(حالانکہ) وہ (ایک دوسرے کو) دکھائے جا رہے ہوں گے، مجرم آرزو کرے گا کہ کاش! اس دن کے عذاب (سے رہائی) کے بدلہ میں اپنے بیٹے دے دے،

وَصَٰحِبَتِهِۦ وَأَخِيهِ

اور اپنی بیوی اور اپنا بھائی (دے ڈالے)،

وَفَصِيلَتِهِ ٱلَّتِى تُـْٔوِيهِ

اور اپنا (تمام) خاندان جو اُسے پناہ دیتا تھا،

وَمَن فِى ٱلْأَرْضِ جَمِيعًۭا ثُمَّ يُنجِيهِ

اور جتنے لوگ بھی زمین میں ہیں، سب کے سب (اپنی ذات کے لئے بدلہ کر دے)، پھر یہ (فدیہ) اُسے (اللہ کے عذاب سے) بچا لے،

كَلَّآ ۖ إِنَّهَا لَظَىٰ

ایسا ہرگز نہ ہوگا، بے شک وہ شعلہ زن آگ ہے،

نَزَّاعَةًۭ لِّلشَّوَىٰ

سر اور تمام اَعضائے بدن کی کھال اتار دینے والی ہے،

تَدْعُوا۟ مَنْ أَدْبَرَ وَتَوَلَّىٰ

وہ اُسے بلا رہی ہے جس نے (حق سے) پیٹھ پھیری اور رُوگردانی کی،

وَجَمَعَ فَأَوْعَىٰٓ

اور (اس نے) مال جمع کیا پھر (اسے تقسیم سے) روکے رکھا،

۞ إِنَّ ٱلْإِنسَٰنَ خُلِقَ هَلُوعًا

بے شک انسان بے صبر اور لالچی پیدا ہوا ہے،

إِذَا مَسَّهُ ٱلشَّرُّ جَزُوعًۭا

جب اسے مصیبت (یا مالی نقصان) پہنچے تو گھبرا جاتا ہے،

وَإِذَا مَسَّهُ ٱلْخَيْرُ مَنُوعًا

اور جب اسے بھلائی (یا مالی فراخی) حاصل ہو تو بخل کرتا ہے،

إِلَّا ٱلْمُصَلِّينَ

مگر وہ نماز ادا کرنے والے،

ٱلَّذِينَ هُمْ عَلَىٰ صَلَاتِهِمْ دَآئِمُونَ

جو اپنی نماز پر ہمیشگی قائم رکھنے والے ہیں،

وَٱلَّذِينَ فِىٓ أَمْوَٰلِهِمْ حَقٌّۭ مَّعْلُومٌۭ

اور وہ (ایثار کیش) لوگ جن کے اَموال میں حصہ مقرر ہے،

لِّلسَّآئِلِ وَٱلْمَحْرُومِ

مانگنے والے اور نہ مانگنے والے محتاج کا،

وَٱلَّذِينَ يُصَدِّقُونَ بِيَوْمِ ٱلدِّينِ

اور وہ لوگ جو روزِ جزا کی تصدیق کرتے ہیں،

وَٱلَّذِينَ هُم مِّنْ عَذَابِ رَبِّهِم مُّشْفِقُونَ

اور وہ لوگ جو اپنے رب کے عذاب سے ڈرنے والے ہیں،

إِنَّ عَذَابَ رَبِّهِمْ غَيْرُ مَأْمُونٍۢ

بے شک ان کے رب کا عذاب ایسا نہیں جس سے بے خوف ہوا جائے،

وَٱلَّذِينَ هُمْ لِفُرُوجِهِمْ حَٰفِظُونَ

اور وہ لوگ جو اپنی شرم گاہوں کی حفاظت کرتے ہیں،

إِلَّا عَلَىٰٓ أَزْوَٰجِهِمْ أَوْ مَا مَلَكَتْ أَيْمَٰنُهُمْ فَإِنَّهُمْ غَيْرُ مَلُومِينَ

سوائے اپنی منکوحہ بیویوں کے یا اپنی مملوکہ کنیزوں کے، سو (اِس میں) اُن پر کوئی ملامت نہیں،

فَمَنِ ٱبْتَغَىٰ وَرَآءَ ذَٰلِكَ فَأُو۟لَٰٓئِكَ هُمُ ٱلْعَادُونَ

سو جو ان کے علاوہ طلب کرے تو وہی لوگ حد سے گزرنے والے ہیں،

وَٱلَّذِينَ هُمْ لِأَمَٰنَٰتِهِمْ وَعَهْدِهِمْ رَٰعُونَ

اور وہ لوگ جو اپنی امانتوں اور اپنے وعدوں کی نگہداشت کرتے ہیں،

وَٱلَّذِينَ هُم بِشَهَٰدَٰتِهِمْ قَآئِمُونَ

اور وہ لوگ جو اپنی گواہیوں پر قائم رہتے ہیں،

وَٱلَّذِينَ هُمْ عَلَىٰ صَلَاتِهِمْ يُحَافِظُونَ

اور وہ لوگ جو اپنی نمازوں کی حفاظت کرتے ہیں،

أُو۟لَٰٓئِكَ فِى جَنَّٰتٍۢ مُّكْرَمُونَ

یہی لوگ ہیں جو جنتوں میں معزّز و مکرّم ہوں گے،

فَمَالِ ٱلَّذِينَ كَفَرُوا۟ قِبَلَكَ مُهْطِعِينَ

تو کافروں کو کیا ہو گیا ہے کہ آپ کی طرف دوڑے چلے آرہے ہیں،

عَنِ ٱلْيَمِينِ وَعَنِ ٱلشِّمَالِ عِزِينَ

دائیں جانب سے (بھی) اور بائیں جانب سے (بھی) گروہ در گروہ،

أَيَطْمَعُ كُلُّ ٱمْرِئٍۢ مِّنْهُمْ أَن يُدْخَلَ جَنَّةَ نَعِيمٍۢ

کیا ان میں سے ہر شخص یہ توقع رکھتا ہے کہ وہ (بغیر ایمان و عمل کے) نعمتوں والی جنت میں داخل کر دیا جائے گا؟،

كَلَّآ ۖ إِنَّا خَلَقْنَٰهُم مِّمَّا يَعْلَمُونَ

ہرگز نہیں، بے شک ہم نے انہیں اس چیز سے پیدا کیا ہے جسے وہ (بھی) جانتے ہیں،

فَلَآ أُقْسِمُ بِرَبِّ ٱلْمَشَٰرِقِ وَٱلْمَغَٰرِبِ إِنَّا لَقَٰدِرُونَ

سو میں مشارق اور مغارب کے رب کی قَسم کھاتا ہوں کہ بے شک ہم پوری قدرت رکھتے ہیں،

عَلَىٰٓ أَن نُّبَدِّلَ خَيْرًۭا مِّنْهُمْ وَمَا نَحْنُ بِمَسْبُوقِينَ

اس پر کہ ہم بدل کر ان سے بہتر لوگ لے آئیں، اور ہم ہرگز عاجز نہیں ہیں،

فَذَرْهُمْ يَخُوضُوا۟ وَيَلْعَبُوا۟ حَتَّىٰ يُلَٰقُوا۟ يَوْمَهُمُ ٱلَّذِى يُوعَدُونَ

سو آپ انہیں چھوڑ دیجئے کہ وہ اپنی بے ہودہ باتوں اور کھیل تماشے میں پڑے رہیں یہاں تک کہ اپنے اس دن سے آملیں جس کا ان سے وعدہ کیا جا رہا ہے،

يَوْمَ يَخْرُجُونَ مِنَ ٱلْأَجْدَاثِ سِرَاعًۭا كَأَنَّهُمْ إِلَىٰ نُصُبٍۢ يُوفِضُونَ

جس دن وہ قبروں سے دوڑتے ہوئے یوں نکلیں گے گویا وہ بتوں کے اَستھانوں کی طرف دوڑے جا رہے ہیں،

خَٰشِعَةً أَبْصَٰرُهُمْ تَرْهَقُهُمْ ذِلَّةٌۭ ۚ ذَٰلِكَ ٱلْيَوْمُ ٱلَّذِى كَانُوا۟ يُوعَدُونَ

(ان کا) حال یہ ہو گا کہ ان کی آنکھیں (شرم اور خوف سے) جھک رہی ہوں گی، ذِلت ان پر چھا رہی ہوگی، یہی ہے وہ دن جس کا ان سے وعدہ کیا جاتا تھا،